अध्यक्ष

उत्तरी गोर्खा अठारसय खोला तमु समाज, काठमाडौं केवल एउटा संस्था होइन, यो उत्तरी गोर्खाबाट काठमाडौं उपत्यकामा आई बसोबास गर्दै आउनुभएका हामी सम्पूर्ण तमु (गुरुङ) हरूको साझा घर, साझा पहिचान र आपसी सम्बन्धको एउटा सुन्दर माध्यम हो। जन्मभूमिबाट टाढा रहेर हामी विभिन्न पेशा, व्यवसाय र जिम्मेवारीमा व्यस्त छौं। जीवनका आ-आफ्नै संघर्ष र व्यस्तताका बीच कहिलेकाहीँ आफ्ना मानिसहरू, आफ्नो गाउँ, आफ्नो भाषा, संस्कार र संस्कृति सम्झिंदा हामीलाई एउटा आफ्नोपनको आवश्यकता महसुस हुन्छ।

हामीमध्ये कोही सफलताको खुसीमा हुनुहुन्छ, कोही संघर्षको यात्रामा हुनुहुन्छ। कसैलाई रोजगारीको अवसर आवश्यक पर्न सक्छ, कसैलाई व्यवसायमा सहयोग, कसैलाई सामाजिक तथा पारिवारिक समस्या पर्दा साथ र सहारा। यस्ता परिस्थितिमा "म एक्लो छैन, मेरो समाज मेरो साथमा छ" भन्ने अनुभूति नै हाम्रो सबैभन्दा ठूलो शक्ति हो।

त्यसैले उत्तरी गोरखा अठारसय खोला क्षेत्रबाट काठमाडौं उपत्यकामा बसोबास गर्नुहुने सम्पूर्ण तमु दाजुभाइ तथा दिदीबहिनीहरूलाई यस समाजमा आबद्ध हुन हार्दिक आह्वान गर्दछु। हामी केवल कार्यक्रम गर्न वा भेटघाट गर्न मात्र होइन, हाम्रो परम्परा अनुसार जन्म हुँदा गरिने प्रकृयाहरू, छेवर गर्दा गरिने प्रकृयाहरू, विवाह गर्दा गरिने प्रकृयाहरू, मृत्यु हुँदा गरिने प्रकृयाहरू र मृत्यु पश्चात् गरिने अर्घुङ जस्ता संस्कार र संस्कृतिलाइ बैज्ञानिक ढंकबाट संरक्षण गरी पहिचानलाइ युवा पुस्तामा हस्तान्तरण गरेर एकअर्कालाई सहयोग गर्न, अनुभव र अवसरहरू बाँड्न, नयाँ पुस्तालाई जोड्न, सुखमा सँगै रमाउन र दुःखमा सँगै उभिन एकताबद्ध हुन चाहन्छौँ ।

हाम्रो भाषा, संस्कार, संस्कृति र मौलिक पहिचानलाई संरक्षण गर्दै सामाजिक, शैक्षिक, आर्थिक तथा व्यावसायिक क्षेत्रमा एकअर्काको क्षमता र सम्भावनालाई उपयोग गर्न सक्ने बलियो समुदाय निर्माण गरौँ।

आज हामी जोडियौँ भने भोलि हाम्रो पुस्ता अझ बलियो हुनेछ। आउनुहोस्, आफ्नो समाजलाई आफ्नो परिवारझैँ सम्झौँ—जोडिऔँ, सहयोग गरौँ, सुख–दुःख बाँडौँ र सँगसँगै अघि बढौँ।

समाजको विकासमा यहाँहरूको सक्रिय सहभागिता, साथ, सुझाव र सहयोगको अपेक्षा गर्दछु।